喺欧洲足协巧妙嘅赛制「安排」下，欧联附加赛出现唔少顶级戏码，好似AC米兰同燕豪芬今晚次回合就要继续打生打死。其实小弟都好希望见到呢两队同时杀入分组赛，因为大都有唔少令人惊喜嘅顶级新人，好似艾沙拉维、巴洛迪利、韦拿杜姆同萨卡利亚巴卡利4个「90后」都係好波之人。首回合打成1:1未分高下，今晚呢班超新星肯定打甩髀，1.68倍入球大抵玩!

　　首回合两队踢成1:1，AC上场作客燕豪芬表现唔错，教练阿里基将巴洛迪利改造到有啲似进攻中场，「巴神」亦都交到货，更曾经有一次妙射中楣。相信最令班AC球迷开心嘅係，上季尾一度状态低沉嘅艾沙拉维，季初表现似乎返晒嚟，佢同巴洛迪利好有默契，「红黑兵团」火力唔使怀疑。唯一隐忧係后防始终唔稳阵，门将艾比亚迪首回合虾碌，今场要佢保持不失都唔易。

　　燕豪芬今个暑假虽然卖走大批球星，但唔可以唔服佢哋嘅青训力量。新人辈出下，90年出世嘅韦拿杜姆同96年出世嘅萨卡利亚巴卡利已经係球队支柱，畀唔少欧洲大球会吼实，如果燕豪芬不幸入唔到欧联分组赛，呢两位超新星随时会畀人撬走。

　　讲到底，燕豪芬一向都係崇尚兰足球进攻风格，何况佢哋首回合失咗个作客入球，今场点都要有波入先至有机会晋级，咁即係要同AC抢攻，咁入球大就有计啦!